Public Relation

​ኤክቱስ ታኅሣሥ 16/2018 ዓ.ም ​በኢትዮጵያ ኦርቶዶክስ ተዋሕዶ ቤተ ክርስቲያን የሰንበት ትምህርት ቤቶች ማደራጃ መምሪያ ማኅበረ ቅዱሳን ዲላ ማዕከል የንዋየ ቅድሳት እጥረት ላለባቸው አብያተ ክርስቲያናት ማለትም በይርጋጨፌ ወረዳ ቤተ ክህነት ሥር ለሚገኘው ለኤላ ጠነቻ ቅዱስ ዑራኤል፣ በቡሌና ረጴ ወረዳዎች ቤተ ክህነት ሥር ለሚገኘው ለላባ ቅዱስ ጊዮርጊስ እና በኮሬ ወረዳ ቤተ ክህነት ሥር ለሚገኘው ለቆሬ ቅዱስ ገብርኤል አብያተ ክርስቲያናት የሚውል የንዋየ ቅድሳት ድጋፍ አስረክቧል። ማዕከሉ ከበጎ አድራጊ ምዕመናን ያስተባበረው ይህ ድጋፍ በገንዘብ ሲሰላ በድምሩ 178,230 (አንድ መቶ ሰባ ስምንት ሺህ ሁለት መቶ ሠላሳ) ብር የሚያወጣ መሆኑ ተገልጿል። ​በርክክብ መርሃ ግብሩ ላይ የማኅበረ ቅዱሳን ዲላ ማዕከል የጽሕፈት ቤት ኃላፊ ምንላርግህ የትዋለ እና የማዕከሉ ሙያ፣ ገዳማት እና መንፈሳዊ ትምህርት ቤቶች አገልግሎት ክፍል ኃላፊ ለዓለም ድብቁ ተገኝተው ድጋፉን ለሀገረ ስብከቱ ጳጳስና የቅዱስ ሲኖዶስ አባል ለሆኑት ለብፁዕ አቡነ ገሪማ አስረክበዋል። ብፁዕነታቸውም ድጋፉን ከተረከቡ በኋላ ለቤተ ክርስቲያን አገልግሎት መሳለጥ ይህንን ተግባር ለፈጸሙ ምዕመናን ጸሎትና ቡራኬ ያደረጉ ሲሆን ይህንን መሰል ድጋፎች ተጠናክረው እንዲቀጥሉ አባታዊ ጥሪያቸውን አቅርበዋል። ​ብፁዕነታቸው ከማዕከሉ ኃላፊዎች የተረከቧቸውን ንዋየ ቅድሳትና አልባሳት በአገልግሎት እጥረት ለሚገኙ አብያተ ክርስቲያናት እንዲደርስ አስረክበዋል። በዚህም መሠረት ብፁዕነታቸው በይርጋጨፌ ወረዳ ለሚገኘው ኤላ ጠነቻ ቅዱስ ዑራኤል፣ በቡሌና ረጴ ወረዳዎች ለሚገኘው ለላባ ቅዱስ ጊዮርጊስ፣ እንዲሁም በኮሬ ወረዳ ለሚገኙት ለጂጆላ አቡነ ገብረ መንፈስ ቅዱስ፣ ለኬሬዳ ቅድስት ሥላሴ፣ ለጉልቤ ቅድስት ማርያም እና ለጉሙሬ ኢየሱስ አብያተ ክርስቲያናት ተደራሽ እንዲሆኑ ለየወረዳ ቤተ ክህነቱ ሥራ አስኪያጆችና ጸሐፊዎች ተረክበዋል። ​ይህ በማኅበረ ቅዱሳን አስተባባሪነት የተከናወነው ተግባር ሀገረ ስብከቱ ከዚህ ቀደም የሚተገብረው ተግባር ሲሆን በገጠር አካባቢ የሚገኙ አብያተ ክርስቲያናት ሥርዓተ አምልኮንና ምስጢራተ ቤተ ክርስቲያንን ያለ ንዋየ ቅድሳት ችግር በተሟላ ሁኔታ እንዲያከናውኑ ትልቅ አቅም የሚፈጥር መሆኑ ተጠቁሟል።

ኤክቱስ ታኅሣሥ 16/2018 ዓ.ም ​በኢትዮጵያ ኦርቶዶክስ ተዋሕዶ ቤተ ክርስቲያን የጌዴኦ ኮሬና ቡርጂ ሀገረ ስብከት በዲላ ከተማ ለሚያስገነባው የመንበረ ጵጵስና ሕንጻ ለገቢ ማስገኛ የሚሆን የሎተሪ ዕጣ መዘጋጀቱን ሀገረ ስብከቱ አስታውቋል። ይህ ታላቅ መንፈሳዊ ፕሮጀክት ከብፁዕ ሊቀ ጳጳሱ መቀመጫነት ባለፈ በሀገረ ስብከቱ የሚከናውኑ ልዩ ልዩ መንፈሳዊ አገልግሎቶች የሚከናወኑበት መሆኑ ተገልጿል። ​በዛሬው ዕለት በተከናወነው የሎተሪ ማከፋፈያ መርሃ ግብር ላይ የሀገረ ስብከቱ ጳጳስና የቅዱስ ሲኖዶስ አባል ብፁዕ አቡነ ገሪማ የተገኙ ሲሆን ሥራው በአጭር ጊዜ እንዲጠናቀቅ የሁሉም ሰው ኃላፊነት መሆኑን አባታዊ መልእክት አስተላልፈዋል። ብፁዕነታቸው እንዲህ ያሉ የልማት ሥራዎች የቤተ ክርስቲያንን ክብር ከማስጠበቅ ባለፈ ምእመናን በረከት እንዲያገኙ ዕድል እንደሚፈጥሩ ገልጸዋል። ​በመርሃ ግብሩ ላይ የሀገረ ስብከቱ ዋና ሥራ አስኪያጅ መልአከ ሕይወት ብርሃኑ ክፍሌ፣ የሀገረ ስብከቱ ዋና ጸሐፊ መልአከ ብርሃን አጥናፉ ማሞ፣ የየክፍል ኃላፊዎች፣ የየወረዳ ቤተ ክህነቱ ዋና ሥራ አስኪያጆችና ጸሐፍት፣ የአድባራት አስተዳዳሪዎች እና የመንበረ ጵጵስና ሕንጻ አሠሪ ኮሚቴዎች ተገኝተዋል። ​ሀገረ ስብከቱ ለገቢ ማስገኛው ያዘጋጀውን ይህንን የሎተሪ ዕጣ ለስድስቱ ወረዳ ቤተ ክህነትና ለማኅበረ ቅዱሳን ዲላ ማዕከል በዛሬው ዕለት አከፋፍሏል። ​ይህ በዲላ ከተማ የሚገነባው የመንበረ ጵጵስና ሕንጻ ግንባታው ሲጠናቀቅ የሀገረ ስብከቱ ለመንፈሳዊ አገልግሎት መሳለጥ ከፍተኛ ፋይዳ እንደሚኖረው ታምኖበታል። ዕጣው የሚወጣበትን ቀን ሀገረ ስብከቱ የሚያሳውቅ ይሆናል።

ኤክቱስ ታኅሣሥ 14/2018 ዓ.ም ብፁዕ አቡነ ገሪማ የጌዴኦ ኮሬና ቡርጂ ሀገረ ስብከት ጳጳስና የቅዱስ ሲኖዶስ አባል በጪጩ ደብረ ኃይል ቅዱስ ገብርኤል ቤተ ክርስቲያን ለሚከበረው ዓመታዊ የታኅሣሥ 19 የቅዱስ ገብርኤል የንግሥ በዓል እየተደረጉ ያሉ የቅድመ ዝግጅት ሥራዎችን በቦታው ተገኝተው ጎብኝተዋል። በጉብኝቱ የሀገረ ስብከቱ ዋና ጸሐፊ መልአከ ብርሃን አጥናፉ ማሞ፣ የሀገረ ስብከቱ የፕሮጀክት ማናጀር ቀሲስ ጤናው እንዳላማው፣ የጪጩ ቀበሌ የኢንዱስትሪ ቀጠና አስተዳደር አቶ ብርሃኑ፣ የወረዳ ቤተ ክህነቱ ዋና ሥራ አስኪያጅ ሊቀ ጠበብት መሪጌታ መሰረት፣ የደብሩ አስተዳዳሪ መልአከ ኃይል ሀብቴ ገብረ ሕይወት እንዲሁም ባለድርሻ አካላት ተገኝተዋል። ብፁዕነታቸው በጉብኝታቸው በደብሩ እየተከናወኑ ያሉ የጽዳት ሥራዎችን የተመለከቱ ሲሆን በተለይም ደብሩ ራሱን በራሱ ለመቻል እያከናወናቸው ያሉ የልማት ሥራዎችን ተመልክተዋል። በደብሩ ቅጥር ግቢ ውስጥ የለሙትና የአካባቢው መገለጫ የሆኑት የቡና እና የእንሰት ተከላ ሥራዎች፣ እንዲሁም ለአካባቢው ማህበረሰብ አገልግሎት ለመስጠት ቅድመ ዝግጅቱን ያጠናቀቀውን የወፍጮ ቤት እንቅስቃሴ በብፁዕነታቸው ተጎብኝቷል። በሌላ በኩል የደብሩ የሰንበት ትምህርት ቤት ተማሪዎች ለበዓሉ የሚመጡ ምዕመናን የሚጠቀሙባቸውን የጧፍ ምርቶች በስፋት በማዘጋጀት ላይ የሚገኙ ሲሆን ይህም የወጣቶች በቤተክርስቲያን አገልግሎትና ልማት ላይ ያላቸውን ተነሳሽነት የሚያሳይ መሆኑ ተገልጿል። የደብሩ አስተዳዳሪ በበኩላቸው በደብሩ ውስጥ እየተከናወኑ ያሉ የግብርና እና የተለያዩ ዘርፈ ብዙ ልማቶች ያሉበትን ደረጃ ለብፁዕነታቸው አስረድተዋል። በጉብኝቱ ወቅት የተገኙት የጪጩ ቀበሌ የኢንዱስትሪ ቀጠና አስተዳደር አቶ ብርሃኑ በበኩላቸው በዓሉ የኢትዮጵያ ኦርቶዶክስ ተዋሕዶ እምነት ተከታዮች ብቻ ሳይሆን የአካባቢው ማኅበረሰብ ሁሉ በጉጉት የሚጠብቀው ታላቅ በዓል መሆኑን ገልጸዋል። በመሆኑም በዓሉ በሰላም እንዲጠናቀቅ ከአካባቢው ማህበረሰብ ጋር በመተባበር ከጸጥታና ከጽዳት አንጻር በርካታ ሥራዎች በኅብረት እየተከናወኑ መሆኑን ለብፁዕነታቸው አስረድተዋል። ብፁዕ አቡነ ገሪማ በጉብኝታቸው ማጠቃለያ ላይ ባስተላለፉት መልእክት ደብሩ ከመንፈሳዊ አገልግሎት በተጨማሪ በልማትና በአካባቢ ጥበቃ ረገድ እያከናወነ ያለው ተግባር የሚበረታታ መሆኑን ገልጸዋል። በተለይም ከአካባቢው አስተዳደርና ከነዋሪው ማኅበረሰብ ጋር ያለው ጠንካራ ትብብር ለበዓሉ ስኬታማነትና ለደብርይ ዕድገት ወሳኝ መሆኑን በመጥቀስ ለዝግጅቱ ስኬት ለደከሙ አካላት ሁሉ ምስጋናቸውን አቅርበው በጸሎት ፈጽመዋል።

ኤክቱስ ታኅሣሥ 7/2018 ዓ.ም ብፁዕ አቡነ ገሪማ የጌዴኦ ኮሬና ቡርጂ ሀገረ ስብከት ጳጳስና የቅዱስ ሲኖዶስ አባል የሀገረ ስብከቱን የፋይናንስ አስተዳደር ለማሻሻል የሚያስችል ውይይት ከአስተዳደር አካላት ጋር አደርገዋል። የውይይቱ ዋና ትኩረት የሀገረ ስብከቱ ጽሕፈት ቤት ሲጠቀምበት የቆየውን ድርብ የሒሳብ አመዘጋገብ (Double-Entry Accounting) ሥርዓት በአጥቢያ አብያተ ክርስቲያናት ተግባራዊ ማድረግ ላይ ነበር። የሀገረ ስብከቱ የፕሮጀክት ማናጀር ቀሲስ ጤናው እንዳላማው ስለ ድርብ የሒሳብ አመዘጋገብ (Double-Entry) አስፈላጊነት ሰፋ ያለ ገለጻ አድርገዋል። ይህ ሥርዓት እያንዳንዱ ገንዘብ በሁለት የሒሳብ መዝገቦች መመዝገብ እንዳለበት የገለጹ ሲሆን ይህም የሒሳብ ስህተቶችን ለመቀነስ እና የገንዘብ አያያዝን ሚዛናዊ (Balanced) ለማድረግ እንደሚረዳ ተናግረዋል። በውይይቱ የተሳተፉት የአድባራት አስተዳዳሪዎችና የአስተዳደር አካላት ሀገረ ስብከቱ ይህንን ዘመናዊ ሥርዓት ወደ አድባራት ለማውረድ እየሠራ ያለው ሥራ የቅድስት ቤተ ክርስቲያንን ገንዘብ በአግባቡ እና በግልጽነት ማስተዳደር እንዲቻል ትልቅ አስተዋጽኦ እንዳለው የገለጹ ሲሆን ሥራውን ሙሉ ለሙሉ ተፈጻሚ እንደሚያደርጉ ተናግረዋል። ይህንን የዘመናዊ የሒሳብ ሥራ በብቃት ለመምራት የሚያስችል የሰው ኃይልን ለማጠናከር በአካውንቲንግ የትምህርት ዘርፍ የተመረቀ እና የሒሳብ ሥራዎችን በብቃት ለመሥራት የፒችትሪ (Peachtree) አመዘጋገብ ሶፍትዌር ዕውቀት ያለው ሰው እንዲቀጠር ተወስኗል። ይህ ቅጥር ሀገረ ስብከቱ በፋይናንስ አያያዝ ሂደት ግልጽነትን እና የሥራ ቅልጥፍናን ለማምጣት ያለውን ቁርጠኝነት እንደሚያሳይ ተገልጿል። በውይይቱ የሀገረ ስብከቱ ዋና ጸሐፊ መልአከ ብርሃን አጥናፉ ማሞ፣ የሀገረ ስብከት የክፍል ኃላፊዎች፣ የመንበረ ጵጵስናና ወናጎ ወረዳ ቤተ ክህነት ዋና ሥራ አስኪያጅና ጸሐፊ፣ የአድባራት አስተዳዳሪዎችና የአስተዳደር አካላት ተገኝተዋል።

ኤክቱስ ታኅሣሥ 5/2018 ዓ.ም በጌዴኦ ኮሬና ቡርጂ ሀገረ ስብከት በመንበረ ጵጵስናና ወናጎ ወረዳ ቤተ ክህነት በቆቲ ደብረ ብርሃን ቅድስት ሥላሴ ቤተ ክርስቲያን የቅድመ ጥምቀት መደበኛ ትምህርት ከተማሩ አንድ መቶ አርባ ዘጠኝ ንዑሰ ክርስቲያን መካከል ሰባ ስምንት ወንድ እና ስድሳ ሦስት ሴት በድምሩ አንድ መቶ ሠላሳ ሁለቱ በዛሬው ዕለት በብፁዕ አቡነ ገሪማ የሀገረ ስብከቱ ጳጳስና የቅዱስ ሲኖዶስ አባል ተጠምቀው የሥላሴን ልጅነት አግኝተዋል። ኢ-አማንያን ወደ ቅድስት ቤተ ክርስቲያን እንዲመለሱና የሥላሴን ልጅነት እንዲያገኙ ማድረግ የቅድስት ቤተ ክርስቲያን ቀዳሚ ተልእኮ ከመሆኑ አንጻር ሀገረ ስብከቱ ይህንን የቅድስት ቤተ ክርስቲያንን አገልግሎት እያስፈጸመ ይገኛል። አዳዲስ አማንያንን የማስጠመቁን ሥራ የደብሩ ስብከተ ወንጌል ከደብሩና ከወረዳ ቤተ ክህነቱ ጋር በመናበብ የተሠራ ሲሆን በቀጣይ ደግሞ አስራ ሰባት አዳዲስ አማንያንን ለማስጠመቅ ቅድመ ዝግጅታቸውን መጨረሳቸውን ገልጸዋል። በዕለቱ የዕለቱን ትምህርት የሀገረ ስብከቱ ዋና ጸሐፊ መልአከ ብርሃን አጥናፉ ማሞ በጌዴኡፋ ቋንቋ አስተምረዋል። በመጨረሻም ብፁዕነታቸው በጌዴኡፋ እና በአፋን ኦሮሞ ዝማሬ ዘምረው እንዲሁም አዳዲስ የተጠመቁ ምዕመናንን ማጽናት እንደሚገባ ገልጸው በአፋን ኦሮሞ እና በአማርኛ ቋንቋዎች ቃለ ምዕዳንና ቡራኬ ሰጥተው በጸሎት ፈጽመዋል። በመርሃግብሩ ላይ የሀገረ ስብከቱ የመንፈሳዊ ትምህርትና የካህናት አገልግሎት ክፍል ኃላፊ መልአከ ሰላም ቆሞስ አባ ዮሐንስ ምሕረቱ፣ የወረዳ ቤተ ክህነቱ ዋና ጸሐፊ ሊቀ ኅሩያን እሸቱ ማሞ የአድባራት አስተዳዳሪዎች፣ ካህናትና ምዕመናን ተገኝተዋል።

ኤክቱስ ታኅሣሥ 2/2018 ዓ.ም