ቀዳሚ ገጽ ዜና

በጌዴኦ ኮሬና ቡርጂ ሀገረ ስብከት በሀገረ ስብከቱ በተቋቋመው በአንዲዳ ደብረ ሰላም መድኃኔዓለም ቤተክርስቲያን የተማሩ የአብነት እና የተለያዩ መሠረታዊ ትምህርትና ሥልጠና የወሰዱ ከ5ት ወረዳ ቤተክህነት የተወጣጡ 5ት ደቀመዛሙርት በብፁዕ አቡነ ገሪማ የጌዴኦ ኮሬና ቡርጂ ሀገረ ስብከት ጳጳስና የቅዱስ ሲኖዶስ አባል ተመረቁ። በምርቃ መርሐ ግብር ከፍተኛ ውጤት ያመጡ ደቀመዛሙርት የተሸለሙ ሲሆን የተለያዩ መጻሕፍት ከማህበረ ቅዱሳን ተሰጥቷቸዋል።በተጨማሪ ያለ ምንም ክፍያ ለስምንት ወራት ያስተማሩ መምህራን በብፁዕነታቸው ተመስግነዋል ሽልማት ተሰጥቷቸዋል። የደብረ ሰላም ቅዱስ ዑራኤል ቤተክርስቲያን ሰንበት ት/ቤት መዘምራን መዝሙር ያቀረቡ ሲሆን ተመራቂ ደቀመዛሙርትም ያሬዳዊ ወረብና ግጥም አቅርበዋል ። ስለ ተመራቂ ደቀመዛሙርት አጠቃላይ ቆይታ በቀሲስ ጤናው እንዳለማው ቀርቧል። አጠቃላይ አጭር ስለ አብነት ት/ቤቱ ሪፖርት በመልአከ ሰላም ቆሞስ አባ ዮሐንስ ምሕረቱ የሀገረ ስብከቱ የትምህርትና የካህናት አገልግሎት ክፍል ኃላፊ ገልጸዋል ። በመጨረሻም በብፁዕ አቡነ ገሪማ የጌዴኦ ኮሬና ቡርጂ ሀገረ ስብከት ጳጳስና የቅዱስ ሲኖዶስ አባል ቃለምዕዳን ያስተላለፉ ሲሆን ደቀመዛሙርት የተሰጣቸውን ተልዕኮ መወጣት ማስተማር እንዳለባቸው አሳስበዋል ።

በዕለቱም የማስተዋወቅ መርሐ ግብሩን ያከናወኑት የሀገረ ስብከቱ ዋና ጸሐፊ በሆኑት በመልአከ ብርሃን ቀሲስ አጥናፉ ማሞ የማስተዋወቅ ሥራ ተከናውኗል። በመጨረሻም በሀገረ ስብከቱ ዋና ጸሐፊ በመልአከ ብርሃን አጥናፉ ማሞ መልካም የሥራና የአገልግሎት ዘመን እንዲሆንላቸው በመመኘት በጸሎት ተፈጽሟል።

የጌዴኦ ኮሬና ቡርጂ ሀገረ ስብከት የሀገረ ስብከት አቀፍ ጠቅላላ ጉባኤ ተሳታፊዎች አዲስ ሀገረ ስብከቱ በዲላ ደብረ ገነት ቅዱስ ሚካኤል ቤተ ክርስቲያን ቅጥር ግቢ ውስጥ የሚያስገነባውን የመንበረ ጵጵስና ሕንጻ ጉብኝት አደረጉ። በጉብኝቱ ብፁዕ አቡነ ገሪማ የሀገረ ስብከቱ ጳጳስና የቅዱስ ሲኖዶስ አባል፣ መልአከ ብርሃን አጥናፉ ማሞ የሀገረ ስብከቱ ዋና ጸሐፊ፣ የሀገረ ስብከቱ የየክፍል ኃላፊዎች፣ የወረዳ ቤተ ክህነት ሥራ አስኪያጆች እና ጸሐፊዎች፣ የአድባራት አስተዳዳሪዎችና ጸሐፊዎች በጠቅላላ ጉባኤው የተገኙ ባለድርሻ አካላት ተገኝተዋል። በጉብኝት ስለሕንጻው አሁናዊ ሁኔታ ገለጻ የሰጡት ኢንጅነር አማኑኤል ሲሆኑ ሕንጻው በደረሰበት ደረጃ መደነቃቸውን ተሳታፊዎቹ ገልጸዋል። በተጨማሪ በቅጥር ግቢ ውስጥ እየተሰሩ የሚገኙት የግብርና የልማት ሥራዎች የተጎበኙ ሲሆን ብፁዕ አቡነ ገሪማ ጳጳስ ወደፊት ስለሚሰሩ ሥራዎች ገለጻ አድርገው እንዲሁም ለመጎብኘት ለመጡት እንግዶች ምስጋና አቅርበው ፍጻሜ ሆኗል።

በኢትዮጵያ ኦርቶዶክስ ተዋሕዶ ቤተ ክርስቲያን በየዓመቱ ሐምሌ ሃያ ሁለት ቀን የሚከበረው የመልአኩ የቅዱስ ዑራኤል በዓለ ንግሥ በዲላ ዋለሜ ደብረ ሰላም ቅዱስ ዑራኤል ቤተ ክርስቲያን ብፁዕ አቡነ ገሪማ የጌዴኦ ኮሬና ቡርጂ ሀገረ ስብከት ጳጳስና የቅዱስ ሲኖዶስ አባል በተገኙበት በታላቅ ድምቀት ተከብሯል። መርሃግብሩ በሀገረ ስብከቱ ትምህርት እና ካህናት አገልግሎት ክፍል ኃላፊ በመልአከ ሰላም ቆሞስ አባ ዮሐንስ ምሕረቱ የተመራ ሲሆን በደብሩ የሰንበት ትምህርት ቤት ዘምርያን ያሬዳዊ ዝማሬ ከቀረበ በኋላ ለዕለቱ የሚስማማ ትምህርት በደብሩ ስብከተ ወንጌል ክፍል ኃላፊ የሆኑት ሊቀ ማእምራን መምህር ሰሎሞን ፈጠነ ተሰጥቷል። የደብሩ የግብርና የልማት ሥራ እንዲጠናከር ትልቅ ሥራ ላደረጉ ለአባ ገብረ አረጋዊ ረታ እና ለዲያቆን አምራች ገብረ ሥላሴ የምስጋና ስጦታ እና የምስጋና የምስክር ወረቀት ተበርክቶላቸዋል። በመጨረሻም ብፁዕ አቡነ ገሪማ የሀገረ ስብከቱ ጳጳስና የቅዱስ ሲኖዶስ አባል የደብሩ የልማት ሥራ እንዲፋጠን የበኩላቸውን አስተዋፅዖ ላደረጉ ሰዎች ምስጋና ካቀረቡ በኋላ ሁሉም አድባራት የተለያዩ የግብርና ሥራዎችን በመስራት ላይ መሆናቸውን ገልጸው በቀጣይ አብያተ ክርስቲያናቱ ወደ አምራችነት ለማሳደግ እየተሰራ ያለውን ሥራ ገልጸው እንዲሁም በዓለ ንግሡን በማስመልከት ቃለ ምዕዳንና ቡራኬ በመስጠት መርሃግብሩን በጸሎት ፈጽመዋል።

ብፁዕ አቡነ ገሪማ የጌዴኦ ኮሬና ቡርጂ ሀገረ ስብከት ጳጳስና የቅዱስ ሲኖዶስ አባል ከዲላ ዩኒቨርስቲ የኮምፒውተር ባለሙያዎች ጋር ተወያዩ። የውይይቱ መሠረታዊ ዓላማ ዘመኑን የዋጀ አገልግሎት ከመስጠትና ከመቀበል አንጻር የኮምፒውተር መሠረታዊ እውቀት መኖር አስፈላጊ መሆኑ ይታወቃል ። ይኸም በሀገረ ስብከቱ ዘመናዊ አገልግሎት ከመስጠት አንጻር ያለውን ክፍተት ለመቅረፍ በቀጣይም ዘመናዊ አሰራር ለመዘርጋት ይቻል ዘንድ የውይይቱ አካል ነበር። ዘመናዊ የኮምፒውተር እውቀት ወረቀት አልባ አገልግሎት እንዲኖር ከማድረጉ በተጨማሪ የኢንተርኔት አገልግሎትን በሚገባ ከተጠቀሙ የመረጃ ልውውጥ የሚያፋጥን መሆኑ እሙን ነው።ይኸንም በቀጣይ የተሻለ አሰራር ለመተግበር የሚያስችል መሆኑ ተመልክቷል ።

በጌዴኦ ኮሬና ቡርጂ ሀገረ ስብከት በጮርሶ ወረዳ አዲስ ለሚሰራው በቅርቡም መንፈሳዊ የእግር ጉዞ ተደርጎበት ውጤታማ ሥራ ለተሰራበት የቂሻ ቅዱስ ዮሐንስ ወልደ ነጎድጓድ ቤተክርስቲያን ህንጻ አሰሪ ኮሚቴ ጋር በቀጣይ በህንጻው ሥራና ጉዳይ ላይ ከብፁዕ አቡነ ገሪማ የሀገረ ስብከቱ ጳጳስና የቅዱስ ሲኖዶስ አባል ጋር ውይይት አደረጉ። በውይይቱም በቀጣይ በህንጻው ሥራ ላይ እስከ አሁን ከምዕመናን የተሰበሰበ ገንዘብ በማቴሪያል ቃል የተገባውን ምዕመናን ገንዘብ ለመስጠት ቃል ገብተው እስከ አሁን ያላስገቡ በቀጣይ በቤተክርስቲያኑ ሕጋዊ አካውንት ማስገባት እንዳለባቸው ትኩረት ተሰጥቶ ውይይት ተደርጓል። የህንጻ ቤተክርስቲያን ተጀምሮ ለማጠናቀቅ በቀጣይ ምዕመናን በቤተክርስቲያኑ ሕጋዊ አካውንት ገንዘብ በማስገባት ድጋፋቸውን ማድረግ ይጠበቅባቸዋል በሌላ በአይነትም ድጋፋቸውን መቀጠል እንዳለበት አጽንኦት ተሰጥቶበታል። ለቂሻ ቅዱስ ዮሐንስ ወልደ ነጎድጓድ የባንክ ሂሳብ ቁጥር 1000705214647 ኢትዮጵያ ንግድ ባንክ በማለት ቃል የገባችሁትን እንድታስገቡልን በቅዱስ ዮሐንስ ወልደ ነጎድጓድ ስም እንጠይቃለን ።

የጌዴኦ ኮሬና ቡርጂ ሀገረ ስብከት ጳጳስ ብፁዕ አቡነ ገሪማ ከአዲስአበባና ከሀዋሳ የመጡ የቤተክርስቲያን ልጆች ጋር በሀገረ ስብከቱ አጠቃላይ ጉዳዮች ጋር ውይይት አደረጉ ብፁዕነታቸዉ በሀገረ ስብከቱ ላለፉት ሁለት አመታት ታቅደው እየተሰሩ ያሉ ስራዎችን እንዲሁም በቀጣይ የሚተገበሩ ስራዎችን ለታዳሚዉ ገለፃ አድርገዋል ። ተሳታፊዎችም ከተደረገዉ ገለጻ በመነሳት በብፁዕ አቡነ ገሪማ ገለፃ በመደረጉ መገረማቸዉን እና አብሪዉ የሚችሉትን ሁሉ ለማገዝ እንደሚፈልጉ ቃል ገብተዋል። በመጨረሻም በግንባታ ላይ የሚገኝዉን መንበረ ጵጵስና የተጎበኝ ሲሆን በነበረው ቆይታ ደስተኛ እንደሆኑ በመግለጽ ከአንድ ነጥብ ሁለት ሚሊዮን ብር በላይ (1,200.000…) ቃል ገብተዋል። #ብፁዕነታቸዉም ድጋፍ ያደረጉትን አመስግነዉ በቀጣይም ከሀገረ ስብከቱ ጎን በመቆም በሀሳብም በገንዘብም አቅም በፈቀደ ሁሉ አብረዉ እንዲያገለግሉ ጥሪ አቅርበዉ በፀሎት ተፈፅሟል።

በጌዴኦ ኮሬ ቡርጂ ሀገረ ስብከት በመንበረ ጵጵስ ዲላና ወናጎ ወረዳ ቤተክህነት ሥር የሚገኘው በጪጩ ደብረ ኃይል ቅዱስ ገብርኤል ቤተክርስቲያን የቅዱስ ገብርኤል ዓመታዊ ክብረ በዓል ብፁዕ አቡነ ገሪማ የሀገረ ስብከቱ ጳጳስና የቅዱስ ሲኖዶስ አባል፣ መልአከ ሕይወት ብርሃኑ ክፍሌ የሀገረ ስብከቱ ዋና ሥራ አስኪያጅ፣ መልአከ ብርሃን አጥናፉ ማሞ የሀገረ ስብከቱ ዋና ጸሐፊ፣ የሀገረ ስብከቱ የየክፍል ኃላፊዎች ፣ የወረዳ ቤተክህነት ዋና ሥራ አስኪያጅ ሊቀጠበብት መሪጌታ መሠረት እና ዋና ጸሐፊ ሊቀ ኅሩያን እሸቱ ዋለ ፣ የደብሩ አስተዳዳሪ መልአከ ኃይል መሪጌታ ሀብቴ ፣የየአድባራት አስተዳዳሪዎች ፣ሊቀውንተ ቤተክርስቲያን፣ የሰንበት ት/ቤት አባላት፣ ቁጥሩ እጅግ ብዙ የሆነ ከሁሉም የኢትዮጵያ ክፍል የተገኙ ምዕመናን በተገኙበት በታላቅ መንፈሳዊ ክብር ተከብሯል ። #በዕለቱም በብፁዕ አቡነ ገሪማ የሀገረ ስብከቱ ጳጳስና የቅዱስ ሲኖዶስ አባል ለድቁና የሚያበቃቸውን ትምህርት ለተማሩ ለ44 ደቀመዛሙርት ማዕረገ ድቁና የሰጡ ሲሆን ለቅስና የሚያበቃቸውን ትምህርት ለተማሩ ለ10ት ዲያቆናት ማዕረገ ቅስና ሰጥተዋል። #ታቦቱ ከመንበረ ክብሩ ወጥቶ ዑደት ካደረገ በኋላ የደብሩ ሰንበት ት/ቤት ያሬዳዊ መዝሙር አቅርበዋል። #በጌዴኦ ዞን በዲላ ከተማ አስተዳደር የዲላ ከተማ ከንቲባ ዶ/ር መስፍን ደምሴ በክብረ በዓሉ ላይ በመገኘት የመልካም ምኞትና የእንኳን አደረሳችሁ መልዕክት አስተላልፈዋል። #ብፁዕ አቡነ ገሪማ የሀገረ ስብከቱ ጳጳስና የቅዱስ ሲኖዶስ አባል በክብር እንግድነት የተገኙትን የዲላ ከተማ ከንቲባንና የሥራ ባልደረቦቻቸውን አመስግነዋል። የዕለቱን ትምህርት ብፁዕ አቡነ ገሪማ የቅዱስ ሲኖዶስ አባል በዓሉን የተ92መለከተ ስለ ቅዱሳን መላእክት በሰውና በእግዚአብሔር መካከል በመላእክትና በሰው መካከል ያለውን ግንኙነት የቅዱስ ጳውሎስን መልዕክት መነሻ በማድረግ የመላእክት እርዳታ አስፈላጊነት ገልጸዋል። የቅዱስ ገብርኤል አማላጅነትና ጥበቃ ቅድስት ኢየሉጣና ቅዱስ ቂርቆስ ቅዱስ ገብርኤል እንደረዳቸውን በሰፊው ትምህርት ሰጥተዋል። በመጨረሻም ጸሎት በመድረግ የበዓሉ ፍጻሜ ሲሆን ጸሎተ ቅዳሴው በብፁዓን አባቶች ተመርቷል።

ብፁዕ አቡነ ገሪማ የጌዴኦ ኮሬና ቡርጂ ሀገረ ስብከት ጳጳስና የቅዱስ ሲኖዶስ አባል በጪጩ ደብረ ኃይል ቅዱስ ገብርኤል ቤተ ክርስቲያን በየዓመቱ በሚከበረው በቅዱስ ገብርኤል ዓመታዊ በዓል ላይ በመገኘት በሀገረ ስብከቱ ለሚገኙ መንፈሳዊ ትምህርታቸው ሲከታተሉ ለነበሩ ለ44 ደቀመዛሙርት የዲቁና እንዲሁም ለ 10 ዲያቆናት የቅስና ሥልጣነ ክህነት ክህነት ሰጥተዋል። ብፁዕነታቸው መልእክት ያስተላለፉ ሲሆን ቅድስት ቤተ ክርስቲያንን ሲያገለግሉ በንጽህናና በቅድስና ማገልገል እንዳለባቸው፣ በማይመጥናቸው ቦታ መገኘት እንደሌለባቸው እና የተቀበሉትን ትልቅ ኃላፊነት በትጋት መጠበቅ እንዳለባቸው መልእክታቸውን ከአደራ ጭምር አስተላልፈዋል።