Konnee ayyaana ulfeesatee birii’ninna bayyii’n bukkitineexi no’oxxi keessumma duuchchinxi
Baga lame kumanna tommenna sallane Gattowaalitixxe Woggake Qullitte fannoke baabbet ayyaani’a nage’ikinna fayyuntet geltineen gennenen.
“ወአልቦ ኅቡዕ ዘኢይትከበት ወአልቦ ክዱን ዘኢይትከሠት
ማር ፬-፳፪
“Leellitabaashsha shoondeexxi hexxebaan ifa fuldo’a malee buqendeexxi hexxebaan.”
Marqoos 4:22
Gootti nna qorsi no’ok Iyyesuusi Kiristoosi dada duuchchixe fayya’a hiyyeexxi haqichchinxe fanno’n fanniseme’e fayyiseechchi uduma qullitte fanno hara lumolla manbe’a hujjaa’na uudemmak Ayihudoot gaabbet ke’neen. Goottinxi fanno lumolla Manbe’a hujjaa’na uundeemmaxxee isexxa baada balleessatee welenxe lame fannon welti Iyyerusaalemi’n afendaaxxe lumoxxe bale’n moongeen. Loolink mani duuchchi tenne bale’n kora tuullaashsha ajanjeen. Sase dhibba wogga’ana kora tuullammale kooba kadeen.
Kaddomalee Mageninik ulfinni heenooke mannixxe fuggonni shoome gato’a dande’ebaan. Sase dhibba wogga uduma Mootitte Illeeni ke’isseen. Qulliyye ke’isseexxi Gedaametiba,Tolcheme manna ke’isseexxi munde dunnaashsha,Hawwaariyaate ke’isseexxi butta duuchcha doone barsiinsaasha asseek Mageni Mootitte Illeeni ke’ise’e qeerraake bari’a shoonde hexxeemmaxa goottinxa fanno fulchito’a qalbe isexxa kekke’issammale Iyyerusaalemi’a marteen.
Okkoonna marteexxi geechcho Kiraakoosi hiyyemaaka qorte’e isi hiyyeeshsha assiteexxi baabbe otte’e ixaana wiliilchiteexxi ixaaniinxi wiliille iimi’a mete wirrite higher dagge sagaddeexxi qullitte fanno moogendeexxa bakka kuldeen. Tenne hundaayye’n bakka ettenee birra’a tommenna torbaaneke’n sanfee qonteexxi caansa tommeke’n galatikina faarot gonshe fulchineen.
Ulfaatendineexxi manfasi qullichchinxi Ila
Gootti nna qorsi Iyyesuusi Kiristoosixxi qullitte fanno manjinxe nna Mageninxe oddo’n hedhemmaki loli diiggeme Mageninxi fayyisatixxi huje ifa fuldeeke ayyaanan.
Telcho konne loola’n baabbe onte xassa xassine ayyaana ulfeessinano wodda Magenokenaa’n eebba alfinona sa’esanenaa’n caalsine ulfeesa hasissaan.
Fanno no’oxxe Betekirstaaneke beesisa no’anna Kiristaanake beesisa kaddeemmaxxe goobake’n usidhine qalbete’n maxxanse’neenen.
Kaddemmaxxe qalbe no’oxxenaa’n lolinka yaada balleessine qullitte fanno xurrite hujenni welt moongeennexxa goshiyyo hasisaan.
Gootti no’ok fannote’n hedhe “አባ ኅድግ ወስረይ ሎሙ እስመ በዘኢየአምሩ ይገብሩ” hiyyat cubbo gattowwal hiyyaak cubbo baada balleessaak aadde aaggo eeyyaake kadeexxa ifa leellisheen.
Tinni baabbe xassa haqqe gubbe balleessitammashshann no’onna qalbete’n hexxeexxa fuggonna gargarunte gattowwaalit gunbe no’oxxe oddonaa’n balleessat jaalala kaasa hasissaan.
Giddii’nin no’oxxe Hagere Sibikete’n afendinaak Magenink Ilaali konnee lumoka ayyaana Yuunesko butta duuchchixxe tare assexxe borreessexxeeka Yuuneskote’n borreessemeeke Gede’inke boga’n ulfeessa gargar assitaaxxen.
Konne ba’la raaga afeeka fannot ayyaana dargaggeeyye adde,ayyunte nna dada ulfeesendeexxi hexxaashsha assitaaxxe adde asse’na’n Kunni fannotik ayyaani qullitte no’oxxe Beete kiristaane’a, boga no’okee nna arda duuchchi’a Nage’inke,jaalalatike nna eebbatike kaddaashsha Mageninxe eeyyante kaddowwaal!
Mageni boga no’oka eebbisowwaal!
Birra’a 16/2019 G.W
Abba Geriima Gede’o Koorenna Burjixxe Hagere Sibikete Phaphaasichcho
